റെയിൽവേ സ്റ്റേഷനിലെ പാർക്കിംഗ് ഏരിയയിലുണ്ടായ വൻ തീപിടിത്തത്തിൽ ബൈക്കുകൾ കത്തിനശിച്ച സംഭവത്തിൽ ഉടമകൾ നിയമനടപടിക്കൊരുങ്ങുന്നു. നഷ്ടപരിഹാരം ആവശ്യപ്പെട്ട് കൺസ്യൂമർ കോടതിയിൽ ഹർജി നൽകാനാണ് ഉടമകളുടെ തീരുമാനം. ‘ടു വീലർ യൂസേഴ്സ് അസോസിയേഷൻ’ സംഘടിപ്പിച്ച യോഗത്തിലാണ് റെയിൽവേയിൽ നിന്ന് നഷ്ടപരിഹാരം ആവശ്യപ്പെട്ട് വ്യക്തിപരമായി കേസുകൾ ഫയൽ ചെയ്യാൻ തീരുമാനമായത്.
കഴിഞ്ഞ ഞായറാഴ്ച രാവിലെയാണ് തൃശൂർ റെയിൽവേ സ്റ്റേഷനിലെ പാർക്കിംഗ് ഏരിയയിൽ തീപിടിത്തമുണ്ടായത്. ഏകദേശം 300-ഓളം ബൈക്കുകൾ അപകടത്തിൽ കത്തിനശിച്ചിരുന്നു. റെയിൽവേ അധികൃതരുടെ അനാസ്ഥയാണ് തീപിടിത്തത്തിന്റെ വ്യാപ്തി വർദ്ധിപ്പിച്ചതെന്ന് ദൃക്സാക്ഷികൾ ആരോപിക്കുന്നു. തീപിടിത്തമുണ്ടായ ഉടൻ വിവരം അറിയിച്ചിട്ടും സ്റ്റേഷൻ മാസ്റ്റർ ഫയർഫോഴ്സിനെ അറിയിക്കാൻ വൈകിയെന്നും, ഈസ്റ്റ് പോലീസ് സ്റ്റേഷനിലെ എസ്.ഐ വിളിച്ചുപറഞ്ഞതിന് ശേഷമാണ് ഫയർഫോഴ്സ് എത്തിയതെന്നും യോഗത്തിൽ പങ്കെടുത്തവർ പറഞ്ഞു.
പാർക്ക് ചെയ്തിരുന്ന ബൈക്കുകൾക്കൊപ്പം ഹെൽമെറ്റ്, റെയിൻകോട്ട്, വാഹനത്തിന്റെ രേഖകൾ, മറ്റ് വിലപിടിപ്പുള്ള സാധനങ്ങൾ എന്നിവയും പലർക്കും നഷ്ടമായിട്ടുണ്ട്. റെയിൽവേയുടെ ഭാഗത്ത് നിന്ന് ഇതുവരെ സഹകരണമൊന്നും ലഭിച്ചിട്ടില്ലെന്നും, സ്ഥലം എം.പി പോലും കാര്യമായി ഇടപെട്ടില്ലെന്നും ഉടമകൾ പരാതിപ്പെടുന്നു. കത്തിനശിച്ച 120-ഓളം വാഹനങ്ങളുടെ ഉടമകൾ യോഗത്തിൽ പങ്കെടുത്തു.
