തൃശ്ശൂർ ജില്ലയിലെ ദേശസാത്കൃത ബാങ്കുകളിലും ധനകാര്യ സ്ഥാപനങ്ങളിലുമായി പത്ത് വർഷത്തിലേറെയായി അവകാശവാദമില്ലാതെ കിടക്കുന്ന നിക്ഷേപം 241.27 കോടി രൂപ. 10.55 ലക്ഷം അക്കൗണ്ടുകളിലായാണ് ഈ തുക.
അവകാശപ്പെടാത്ത നിക്ഷേപങ്ങൾ തിരികെ നൽകുന്നതിനായി ധനകാര്യ സേവന വകുപ്പ് ആർബിഐ, ഐആർഡിഎഐ, സെബി, പിഎഫ്ആർഡിഎ, ഐഇപിഎഫ്എ എന്നിവയുമായി ചേർന്ന് നടത്തുന്ന ‘നിങ്ങളുടെ പണം, നിങ്ങളുടെ അവകാശം’ കാമ്പയിന്റെ ജില്ലാതല മെഗാ ക്യാമ്പ് ഡിസംബർ 19 ന് രാവിലെ 10.30 മുതൽ ഉച്ചയ്ക്ക് 1.00 വരെ നടക്കും.
തൃശ്ശൂർ കുറുപ്പം റോഡിലുള്ള കേരള ബാങ്ക് ബിൽഡിംഗിലെ എ.എസ്.എൻ. നമ്പീശൻ ഹാളിലാണ് ക്യാമ്പ്. പത്ത് വർഷത്തിലധികമായി ഇടപാടുകളില്ലാത്ത അക്കൗണ്ടുകളെയാണ് അവകാശികളില്ലാത്തതായി കണക്കാക്കുന്നത്. അവകാശികളില്ലാ നിക്ഷേപങ്ങളെ കുറിച്ച് ബാങ്ക് രേഖകൾ പ്രകാരമുള്ള വിലാസത്തിൽ അന്വേഷണം നടത്തി അറിയിപ്പ് നൽകാറുണ്ട്. ഈ നടപടിയും സാധ്യമാകാത്ത അക്കൗണ്ടുകളിലെ പണം നൽകാനാണ് ക്യാമ്പ് നടത്തുന്നത്. തുകകളെ കുറിച്ച് പൊതുജനങ്ങളെ ബോധവത്കരിക്കാനും പണം അവകാശികളിലേക്ക് എത്തിക്കാനുള്ള സാഹചര്യം ഒരുക്കാനുമാണ് ക്യാമ്പയിൻ ലക്ഷ്യമിടുന്നത്.
തൃശ്ശൂർ ജില്ലാ ലീഡ് ബാങ്കിന്റെ നേതൃത്വത്തിൽ സംഘടിപ്പിക്കുന്ന ക്യാമ്പിൽ നിക്ഷേപ വിവരങ്ങൾ അറിയാനും അവകാശികൾക്ക് പണം ലഭിക്കുന്നതിനുള്ള മാർഗ്ഗ നിർദ്ദേശങ്ങൾ നേടാനും കഴിയും. ബാങ്കുകൾ, ഇൻഷുറൻസ്, മ്യൂച്ചൽ ഫണ്ട്, പെൻഷൻ ഫണ്ട് സ്ഥാപനങ്ങളുടെ സഹായ കൗണ്ടറുകളും ഒരുക്കിയിട്ടുണ്ട്.
