ഇന്ന് വൈകീട്ട് ആറരയോടെയാണ് സംഭവം. കൊടുങ്ങല്ലൂരിൽ നിന്ന് തൃശൂരിലേക്ക് പോവുകയായിരുന്ന സ്വകാര്യ ലിമിറ്റഡ് സ്റ്റോപ്പ് ബസ് ആണ് അപകടത്തിന് ഇടയാക്കിയത്. ഗതാഗത തിരക്കിനെ തുടർന്ന് ഊരകത്ത് നിന്ന് ചേർപ്പ് വഴി തൃശൂരിലേക്ക് പോവുകയായിരുന്നു സ്വകാര്യ ബസ്. തായംകുളങ്ങരയിൽ വെച്ച് മറ്റൊരു വാഹനത്തെ മറികടക്കുന്നതിനിടെ എതിരെ വന്ന ബൈക്കിൽ ബസ് തട്ടുകയായിരുന്നു.
ബൈക്ക് യാത്രികൻ വാഹനം ഉടൻ തന്നെ നിയന്ത്രിച്ച് നിർത്തിയതിനാൽ പരിക്കേൽക്കാതെ രക്ഷപ്പെട്ടു. തൃപ്രയാർ ഭാഗത്തേക്ക് പോവുകയായിരുന്ന ബൈക്ക് യാത്രികനാണ് അപകടത്തിൽ നിന്ന് ഭാഗ്യം കൊണ്ട് രക്ഷപെട്ടത്. സ്വകാര്യ ബസ് ചേർപ്പ്’ പൊലീസ് കസ്റ്റഡിയിലെടുത്തു. അമിത വേഗതയടക്കം നിയമലംഘനം നടത്തുന്ന ബസുകൾക്കെതിരെ കർശന നടപടിക്ക് ജില്ലാ കളക്ടർ കഴിഞ്ഞ ദിവസം നിർദ്ദേശം നൽകിയിരുന്നു.
