തൃശൂര്‍: ജില്ലയില്‍ മയക്കു മരുന്ന് ഉപഭോഗം വര്‍ദ്ധിച്ചു വരുന്ന സാഹചര്യത്തില്‍ കര്‍ശന നടപടികളു മായി തൃശൂര്‍ സിറ്റി പൊലീസ്. തൃശൂര്‍ സിറ്റി പൊലീസും കെ-9 സ്‌ക്വാഡും (ഡോഗ് സ്‌ക്വാഡ്) ചേര്‍ന്നാണ് നഗരത്തിലും ജില്ലയിലെ വിവിധ സ്ഥലങ്ങളിലും വ്യാപക പരിശോധനകള്‍ നടത്തിയത്. തൃശൂര്‍ സിറ്റി പൊലീസ് പരിധിയില്‍ വരുന്ന 20 പൊലീസ് സ്റ്റേഷന്‍ പരിധികളിലും സ്റ്റേഷന്‍ ഹൗസ് ഓഫീസര്‍മാരുടെ നേതൃത്വത്തിലാണ് സംശയാസ്പദമായ ഉറവിടങ്ങളിലും സൂക്ഷിപ്പു കേന്ദ്രങ്ങളിലും വ്യക്തികളുടെ വീടുകളിലും റെയ്ഡ് നടത്തിയത്.
മയക്കുമരുന്നുകള്‍ വില്‍പ്പനക്കെത്തി ക്കുന്ന വരെ സംബന്ധിച്ചും ഉപയോഗിക്കുന്ന വരെ സംബന്ധിച്ചും രഹസ്യാന്വേഷണ വിഭാഗം അന്വേഷണം നടത്തിവരികയാണ്. മയക്കുമരുന്നുകള്‍ കണ്ടെത്തുന്നതില്‍ വൈദഗ്ദ്യം നേടിയ കെ-9 സ്‌ക്വാഡിലെ ഡെല്‍മ (തൃശൂര്‍ സിറ്റി), റാണ (തൃശൂര്‍ റൂറല്‍) എന്നീ നായകളും കൂടിയാണ് തിരച്ചിൽ.
തൃശൂര്‍ സിറ്റി പൊലീസ് പരിധിയില്‍ അനധികൃത മദ്യ നിര്‍മ്മാണം, മയക്കുമരുന്ന് തുടങ്ങിയവ സംബന്ധിച്ച രഹസ്യ വിവരങ്ങള്‍ നല്‍കുന്നതിന് ജില്ലാ ആന്റി നര്‍ക്കോട്ടിക്‌സ് സ്‌ക്വാഡിന്റെ 9497962783 എന്ന നമ്പറില്‍ വിളിക്കാവുന്നതാണ്. കൂടുതല്‍ ശക്തമായ നടപടികള്‍ ഇനിയും തുടരുമെന്ന് സിറ്റി പൊലീസ് കമ്മീഷണര്‍ അറിയിച്ചു.
