ഒരു കുടുംബത്തിലെ നാലുപേരെ വീട്ടിനുള്ളില്‍ മരിച്ചനിലയില്‍ കണ്ടെത്തി. കൊടുങ്ങല്ലൂര്‍ ഉഴവത്തുകടവ് സ്വദേശിയും സോഫ്റ്റ് വെയര്‍ എന്‍ജിനീയറുമായ ആഷിഫ് (41) ഭാര്യ അബീറ, മക്കളായ അസ്റ (14) അനൈനുനിസ്സ (7) എന്നിവരെയാണ് വീട്ടിലെ മുറിക്കുള്ളില്‍ മരിച്ച നിലയില്‍ കണ്ടെത്തിയത്.
രാവിലെ ഒമ്പത് മണിയായിട്ടും ഇവരെ മുറയില്‍ നിന്ന് പുറത്തേക്ക് കാണാത്തതോടെ താഴത്തെ നിലയിലുണ്ടായിരുന്ന സഹോദരി മുകള്‍ നിലയിലെത്തി നോക്കിയത്. തുടര്‍ന്ന് വാതില്‍ ചവിട്ടിത്തുറന്ന് അകത്ത് കടന്നതോടെയാണ് നാല് പേരെയും മുറിക്കുള്ളില്‍ മരിച്ച നിലയില്‍ കണ്ടത്. മുറിയില്‍ ഒരു പാത്രത്തില്‍ എന്തോ വാതകം പുകച്ചിരുന്നതായും കുടുംബാംഗങ്ങള്‍ പറഞ്ഞു.
മരണം സംഭവിച്ചിരിക്കുന്നത് വിഷവാതകം ശ്വസിച്ചാണെന്നാണ് പൊലീസ് പറയുന്നത്. സംഭവം ആത്മഹത്യയാണെന്നും പൊലീസ് കരുതുന്നു. വിഷവാതകം മുറിയില്‍ നിന്ന് പുറത്തേക്ക് പോകാതിരിക്കാന്‍ ജനലുകളും മുറിയിലെ വെന്റിലേറ്ററടക്കം ടാപ്പ് കൊണ്ട് അടയ്ക്കുകയും ചെയ്തിട്ടുണ്ട്.
ആഷിഫിന് സാമ്പത്തിക ബാധ്യത ഉണ്ടായിരുന്നതായും നാട്ടുകാര്‍ പറയുന്നു. വിവരമറിഞ്ഞെത്തിയ കൊടുങ്ങല്ലൂര്‍ പൊലീസ് സംഭവസ്ഥലത്ത് പരിശോധന നടത്തിവരികയാണ്.
