ന്യൂഡല്‍ഹി: ഒരു വര്‍ഷത്തിലേറെയായി നടന്നുവരുന്ന കര്‍ഷകരുടെ സമരം ഒടുവില്‍ ഫലപ്രാപ്തി കണ്ടു. വിവാദമായ മൂന്ന് കാര്‍ഷിക നിയമങ്ങളും കേന്ദ്ര സര്‍ക്കാര്‍ പിന്‍വലിച്ചു. രാജ്യത്തെ കര്‍ഷകരുടെ വേദന മനസ്സിലാക്കുന്നതായി മോദി രാജ്യത്തെ അഭിസംബോധന ചെയ്യവേ വ്യക്തമാക്കി.
സര്‍ക്കാര്‍ കര്‍ഷക ക്ഷേമത്തിനാണ് മുന്‍ഗണന നല്‍കിയിട്ടുള്ളതെന്നും അദ്ദേഹം പറഞ്ഞു. സര്‍ക്കാരിന്റെ ഭാഗത്തു നിന്ന് നിരവധി ശ്രമങ്ങള്‍ നടത്തിയിട്ടും ഒരുവിഭാഗം കര്‍ഷകര്‍ക്ക് ഇപ്പോഴും സ്വീകാര്യമല്ലാത്ത പശ്ചാത്തലത്തിലാണ് മൂന്ന് കാര്‍ഷിക നിയമങ്ങളും പിന്‍വലിക്കുന്നതെന്ന് അദ്ദേഹം പറഞ്ഞു. എല്ലാവരും അംഗീകരിച്ച ബില്ലാണ് കേന്ദ്രം നടപ്പാക്കിയതെന്നും നിരവധി ചര്‍ച്ചകള്‍ക്കും വിദഗ്ധരുടെ അഭിപ്രായങ്ങള്‍ക്കും ശേഷമാണ് കര്‍ഷകരുടെ നന്മ മുന്നില്‍ കണ്ട് നിര്‍ദ്ദിഷ്ട നിയമം കൊണ്ടുവന്നതെന്നും അദ്ദേഹം പറഞ്ഞു.
മുന്‍ സര്‍ക്കാരിന്റെ കാലത്തും ഇത്തരം നിയമങ്ങള്‍ക്കായി ശ്രമം നടത്തിയിരുന്നതായും മോദി പറഞ്ഞു. കര്‍ഷര്‍ക്ക് പെന്‍ഷന്‍ പദ്ധതികള്‍ സഹായകമാണെന്നും അവര്‍ക്കായി ബജറ്റ് വിഹിതം അഞ്ചുതവണ ഉയര്‍ത്തിയതായും പ്രധാനമന്ത്രി പറഞ്ഞു. കര്‍ഷകരില്‍ ഭൂരിഭാഗവും രണ്ട് ഹെക്ടറില്‍ താഴെ ഭൂമിയുള്ളവരും ദരിദ്രരുമാണ്. ചെറുകിട കര്‍ഷകര്‍ക്കായി ഇന്‍ഷൂറന്‍സ് പ്രാബല്യത്തില്‍ വരുത്തും. താങ്ങുവില വര്‍ദ്ധിപ്പിക്കാനുള്ള നടപടികള്‍ സ്വീകരിച്ചതായും മോദി കൂട്ടിച്ചേര്‍ത്തു.
