ഒല്ലൂർ: പുത്തൂർ സുവോളജിക്കൽ പാർക്കിന്റെ നിർമാണം ഇന്ന് തിങ്കളാഴ്ച രാവിലെ വനം മന്ത്രി എ.കെ. ശശീന്ദ്രൻ എത്തും. അവലോകനയോഗം കഴിഞ്ഞ് അദ്ദേഹം മാധ്യമങ്ങളെ കാണും. ഒന്നാംഘട്ടം പൂർത്തീകരിച്ച് കഴിഞ്ഞു. അഡ്മിനിസ്ട്രേറ്റീവ് കെട്ടിടം, മൃഗശാലാ ആശുപത്രി, കിച്ചൻ – സ്റ്റോർ റൂം സമുച്ചയം, പക്ഷികൾ, കരിങ്കുരങ്ങ്, സിംഹവാലൻ കുരങ്ങ്, കാട്ടുപോത്ത് എന്നിവയുടെ കൂടുകൾ തുടങ്ങിയവയാണ് പൂർത്തിയായത്. കോവിഡ് ലോക്ഡൗൺ നീണ്ടുപോകുന്നതാണ് മൃഗങ്ങളെ മാറ്റുന്നതിന് തടസ്സം.
രണ്ടാംഘട്ടത്തിലെ പാർക്കിങ് സോൺ, ഓറിയന്റേഷൻ സെൻറർ, ബയോഡൈവേഴ്സിറ്റി സെൻറർ, ഐസൊലേഷൻ – ക്വാറൻറീൻ കേന്ദ്രങ്ങൾ, പോസ്റ്റുമോർട്ടത്തിനുള്ള കെട്ടിടം, ട്രാം റോഡ് എന്നിവയുടെ മുക്കാൽ ഭാഗവും നിർമാണം കഴിഞ്ഞു. 23 പ്രധാന കൂടുകളാണ് പാർക്കിലുള്ളത്. മൂന്നാംഘട്ടം നിർമാണവും ദ്രുതഗതിയിലാണ്. മൃഗങ്ങളെ മാറ്റിത്താമസിപ്പിക്കുന്നതിനും പാർക്ക് പ്രവർത്തനസജ്ജമാക്കുന്നതിനും ഒരുമാസത്തിനകം ഉത്തരവ് ഉണ്ടാകുമെന്നാണ് അധികൃതരുടെ വിലയിരുത്തൽ.
കേന്ദ്ര സൂ അതോറിട്ടി സയൻറിഫിക് ഓഫീസർ ലക്ഷ്മി നരസിംഹന്റെ നേതൃത്വത്തിലുള്ള സംഘം ഈയിടെ സുവോളജിക്കൽ പാർക്കിലെത്തി പരിശോധന നടത്തി. കേന്ദ്ര സൂ അതോറിട്ടി ടെക്നിക്കൽ കമ്മിറ്റിയുടെ അംഗീകാരം മുമ്പേ ലഭിച്ചതാണ്.
