തൃശൂർ ∙ ജനറൽ ആശുപത്രിയിൽ ഡോക്ടറെ കാണാനെത്തിയ വയോധികയെ ജ്യൂസിൽ ഉറക്കഗുളിക കൊടുത്തു മയക്കി മാല കവർന്ന യുവതിയെ പൊലീസ് പിടികൂടി.
തളിക്കുളം എസ്എൻവി സ്കൂളിനു സമീപം കളരിക്കൽ ലജിതയെയാണ് (41) അറസ്റ്റ് ചെയ്തത്. 60 വയസ്സുള്ള സ്ത്രീയോട് അടുപ്പം കൂടി ജ്യൂസ് നൽകി. സ്ത്രീക്ക് ക്ഷീണം അനുഭവപ്പെട്ടപ്പോൾ മടിയിൽ തലവച്ച് ഉറങ്ങാൻ അനുവദിച്ചു. മാല കവർന്നു സ്ഥലം വിട്ട യുവതി നഗരത്തിൽ തന്നെ മാല പണയം വച്ചു പണം കൈക്കലാക്കി.
പരാതി ലഭിച്ചതിനെത്തുടർന്നു പൊലീസ് സിസിടിവി ക്യാമറയിൽ നിന്നു ലഭിച്ച ദൃശ്യങ്ങൾ പരിശോധിച്ചാണു പ്രതിയെ പിടികൂടിയത്. പണയം വച്ച മാല പിടിച്ചെടുത്തു പരിശോധിച്ചപ്പോൾ മുക്കുപണ്ടമാണെന്നു കണ്ടെത്തി. വ്യാജസ്വർണം പണയം വച്ചതിനും യുവതിക്ക് എതിരെ കേസെടുത്തു.
